Ekipa fuan nian mai Timor-Leste

 

Ekipa fuan nian mai Timor-Leste

 

17 Marsu 2016

 

Ema atus ida resin iha Maliana no Dili mak sei simu konsulta gratis husi espesialista sira fuan nian iha fulan Marsu ne’e. Espesialista sira ne’e mak halo parte organizasaun ida naran East Timor Hearts Fund. Organizasaun Australianu ne’e mak úniku no dedika sira nia espesialidade fuan nian atu bele salva ema nia vida ne’ebé iha moras fuan no, ema moras sira ne’e sei bele simu tratamentu gratis iha Austrália.

 

Voluntárius husi ekipa médika East Timor Hearts Fund nian sei halo konsulta gratis ba ema sira ne’ebé mak simu ona refénsia husi doutór lokál tanba, doutór lokál hetan ona katak ema sira ne’e iha sintomas moras fuan hanesan febre reumátika, kondisaun kardíaka, defeitu konjênitu “kuak iha fuan”.

 

Konselleru Médiku Onoráriu husi organizasaun karidade ne’e, Dr Noel Bailey, ne’ebé halo serbisu ne’e pro bono (serbisu voluntáriu) iha Timor-Leste ba tinan 16 nia laran ona. Dr Noel Bailey dehan katak ema barak hetan febre reumátika (febre reumátika sei bele sai moras kardiaka reumátika) tanba falta de saneamentu no falta bee moos.

 

“Ema barak mak la hatene tansá mak sira iha sintomas hanesan dada-iis la di’ak, ain-buku, lakon sentidu no sente fraku. Ema sira la hatene, liuliu mak iha área rurál sira, ema sira la iha asesu ba serbisus saúde nian no la iha espesialista kardiáku diagnóstiku atu bele identifika sira nia moras”. Dr Noel Bayley dehan.

 

“Dalabarak mak ema sira moras mai haree ami ho sira-nia kondisaun avansadu liu ona”

 

“Maibé, se sira simu tratamentu iha Austrália ema sira sei bele rekupera fali no sira sei bele iha fali vida ativu/ normál.”

 

Voluntárius husi ekipa médika East Timor Hearts Fund nian - sei halo parte mós kardiolojista Dr Simon Eggleton, durubasa Timór-oan/Austália no ema administrativu sira - sira sei to’o Timor 17 Marsu no sei haree ema moras ho fuan iha loron haat nia laran iha Dili e Maliana.

 

“Prosesu konsulta ne’e ema sei la sente moras, no sei la lorin tempu barak. Ami uza mákina eko-kardiogram ida atu lenu ba fuan hanesan ultrasound no ami bele haree imajem moris fuan nian iha ekran mákina nian.” Dr Bailey dehan.

 

“Prosesu ne’e mak sei ajuda ami atu haree didiak ema nia fuan nia kondisaun halonu’usá.”

  

“Ami buka pasiente sira ne’ebé iha kondisaun moras fuan ne’ebé bele halo kedas tratamentu iha Austrália. Tratamentu ne’e bele hanesan opera loke fuan atu troka ka hadia válvola aat, ka dalaruma ami lalika opera loke fuan mas dalaruma ami hadia fuan tuir téknika ida naran ‘mitral ballon’ ne’ebé ami hatama balaun oan ida ba ema nia fuan atu bele haluan fali ema nia válvola ne’ebé klo’ot hela.”

 

Dala ida ke ami identifika loloos moras sira ho moras fuan, East Timor Hearts Fund sei oferese tratamentu dia’k nian no gratis iha Austrália. East Timor Hearts Fund mós sei organiza transporte, hela-fatin no buat seluk tan gratis hotu. Ema saúde nian ida no durubasa mak sei akompaña ema moras atu bá Austrália. Se mak ema moras tinan ki’ik entaun inan ka amna mós bele akompaña to’o Austrália.

 

Desde tinan 2010 mak East Timor Hearts Fund halo serbisu ne’e iha Timor-Leste no salva tiha ona ema moras 30 (inklui pasiente ida ho tinan 11).

 

Ângela tian 23 uluk moras fuan todan no nia para tiha ba universidade. Maibé nia mai Austrália fulan Marsu 2015 (Melbourne) atu halo tratamentu ‘mitral ballon’ (hatama balaun iha nia fuan) iha ospitál MonashHeart mak agora nia konsegue duni ramata ninia kursu Torismu nian.

 

“Bainhira ha’u simu ha’u-nia diploma ha’u sente katak ha’u hetan sorte duni iha mundu ne’e! Agora ha’u iha saúde di’ak, no mós ha’u to’o duni de hotu ha’u-nia universidade. Buat ida ke uluk ha’u la mehi atu hetan. Agora ha’u sente ke ha’u bele ajuda dezenvolve ha’u-nia rai doben Timor,” Ângela dehan.

 

East Timor Hearts Fund nia CEO, Ken Dusting, dehan katak oranizasaun ne’e agora boot liu tan, la’ós de’it atu salva ema nia vida maibé serbisu hamutuk ho parseirus sira seluk iha projetus sira ne’ebé bele identikika loloos no prevene kauza sira ne’ebé halo ema sira moras fuan iha Timor-Leste.

 

“Hanesan agora dadauk ne’e ami ko’alia hela ho Governu Timor-Leste kona-ba planu ida atu ami bele hala’o (primeira véz iha Timor) estudu ida kona-ba moras kadíaka reumátika (moras fuan) iha Timor-Leste tinan ne’e,” Sr Dusting dehan.

 

“Projetu ne’e sei halo hamutuk ho Institutu Telethon Kids, organizasaun prinsipál peskiza médika iha Austrália. Projetu ne’e sei envolve haree haree ema 1000 iha eskolas iha Timor nia laran atu ami bele haree loloos ho presizaun insidente moras kardíaka reumátika.”

 

“Dala ida ke ami hatene loloos extensaun problema ne’e, ami bele serbisu hamutuk ho organizaun governamentál no naun-govermentál atu hamutuk bele efikazmente enfrenta moras evitável ne’e.”

 

Hamutuk ho ami-nia parseiru lokál Bairro Pité Clinic, East Timor Hearts Fund mós atu lansa programa pininsilina ida, ne’ebé ema sira foin iha sintomas febre reumátika. Ai-moruk pininsilina ne’e mak sei hapara moras kardíaka reumátika (moras fuan).

 

Atu hetan tan informasaun: easttimorheartsfund.org.au / info@easttimorheartsfund.org.au

 

 

 

 

 

 

Write a comment

Comments: 0