Hodi halo sirujia iha Austrália enfermeira Timór-oan ida simu tratamentu fuan nian.

Enfermeira pediatria Timór nian Teresinha da Costa simu esperiénsia foun ida kona-ba sistema saúde públika Australia nian. Tuir karidade ajuda médika East Timor Hearts Fund, fulan April ne’e  iha Royal Melbourne Hospital (RMH) Teresinha hetan sirujia fuan ida ne’ebé salva nia vida. 

Teresinha, serbisu nu’udar enfermeira pediatria nian iha Hospitál Nasionál Guido Valadares iha Dili. Teresinha to’o iha Melbourne ho nia laen doutór Victor Sarmento. 

Iha loron 13 fulan Abril iha RMH Teresinha halo sirujia komplexu ida atu hadia defeitu konjénitu fuan nian, ne’ebé Teresinha hetan wainhira nia moris. 

“Ha’u ho ha’u-nia laen sempre hakarak mai to’o Austrália atu haree ho matan Austrália nia sistema saúde públiku nian. Ami sempre iha esperansa katak ho Na’i Maromak nia tulun doutór sira iha Melbourne sei tulun no tau matan mai ha’u,” Teresinha dehan.

Konsultivu médiku onoráriu East Timor Hearts Fund nian Dr Noel Bayley hato’o katak Teresinha (tinan 28), antes de halo sirujia fuan nian nia sofre moras fuan naran persisténsia kanál arteriál (PDA ho lian Inglés). Moras fuan ne’e konexaun anormál ida entre vazus ka passajem boot nian iha hirus-matan besik fuan. Iha rai sira dezenvolvidus liu ema sira ne’ebé moris ho moras fuan ne’e sempre hetan tratamentu durante sira-nia infánsia. 

“Moras fuan ne’e provoka presaun iha ventríkulu sorin karuk fuan nian. Ventríkulu ne’e mak passajem/ kâmera prinsipál bombeamentu fuan nian. Se mak la halo tratamentu sei bele kauza fallansu iha fuan,” Dr Bayley dehan. 

“Teresinha uluk hetan ona isufisiênsia kardiaka klínika. Teresinha nia perspektiva moris nian ladún di’ak, se mak nia la halo tratamentu ka halo sirujia ne’e” Dr Bayley dehan.

“Infelizmente, enkuantu fasilidades saúde nian ia Timor-Leste haburas dadauk ba oin, atualmente Timór-Leste ladauk iha fasilidades espesialistas kardíakas nian, tanba ne’e mak tratamentu iha tasi-balun opsaun únika ida ba pasiente sira hanesan Teresinha.” Dr Bayley dehan. 

“Nu’udar enfermeira espesialista ida Teresinha bele halo kontribuisaun importante ba Timor-Leste nia futuru. Ami hotu iha East Timor Hearts Fund sente orgullu tebes katak ami bele ajuda Teresinha ho opurtunidade ida-ne’e.”

East Timor Hearts Fund mak organizasaun karidade mesak ida, ne’ebé ajuda fornese sirujia kardíaka atu salva ema nia vida iha Austrália ba joven Timór-oan sira. Dezde tinan 2010 mak East Timor Hearts Fund hala’o ona klínika maizumenus 12 iha Timor-Leste nia laran, no mós ajuda Timór-oan tolunulu resin (pasiente klosan liu mak ho tinan 11) ba to’o Austrália atu halo operasaun ka sirujia fuan nian iha Melbourne.

Kardiolijista intervensionista Dr Will Wilson dehan katak Teresinha agora rekupera di’ak loos depois de nia halo sirujia ba nia moras fuan persisténsia kanál arteriál iha Royal Melbourne Hospital. Sirujia ne’ebé Teresinha halo susessu duni. Doutór sira uza teknolojia avansadu tebes. Sira uza aparellu médiku ida hanesan fixa expansível ida iha Teresinha nia fuan.

“Teresinha nia persisténsia kanál arteriál pelumenus boot doubru nian, kompara ho ema sira ne’ebé ami bainbain haree. Atu ami konsegue taka kuak iha Teresinha nia fuan ami ekipa médika, hetan dezafiu boot ida,” Dr Wilson dehan. 

“Ami konsegue taka duni kuak iha Teresinha nia fuan sem de halo open-heart (opera loke fuan). Ami uza de’it fixa expansível ne’ebé halo ho nitinól (hanesan ligadura ida halo ho titâniu ho nikél), hanesan hena ho manxas ho kustura iha laran holo poliéster. 

“Ami hatama fixa ne’e atravéz tubu trêz milímetrus nian tuir veia femurál, iha parte superiór ain leten nian. Tanba Teresinha nia defeitu iha fuan boot loos, entaun ami uza fixa oinseluk, la’ós hanesan sira seluk ami bainbain kustuma uza.

“Teresinha nia sirujia la komplikadu ida. Teresinha agora dadauk rekupera di’ak loos. Liu loron ida depois de Teresinha halo sirujia, ultra-som kardíaku ida hatudu katak kuantidade fluxu reziduál ki’ik duni mak suli iha persisténsia kanál arteriál . Ami espera katak Teresinha sei nota/ sente diferensa boot kompara ho sintomas ne’ebé uluk nia sente ho agora nian. Sertamente ke agora ninia expektativa de vida di’ak liu kompara ho uluk.”

Teresinha dehan katak durante nia moras fuan nia dada-iis la dia’k, oin-halai hela de’it, serbisu la di’ak no la bele iha oan tan. 

“Agora ha’u sente di’ak liu ona. Ha’u la bele hein atu fila ba serbisu. Maibé importante liu mai ha’u mak atu fila ba Timór atu haree ha’u-nia oan mane (nia fulan 6). Ha’u-nia oan ida de’it. Ha’u hadomi nia tebtebes,” Teresinha dehan.

“Ha’u atu hato’o ha’u-nia agradesimentu ba doutór sira no doadores sira ne’ebé ajuda ha’u atu halo tratamentu fuan nian iha Austrália. Liafuan obrigadu la to’o, maibé atu buka tan liafuan agradesimentu seluk la iha. Ha’u sei la haluha favór ne’ebé sira halo mai ha’u,”

Média kontatu: Ingrid Svendsen, +61 409 007 530

 

 

 

Write a comment

Comments: 0